დავიბადე 1981 წელს, საქართველოში, ქალაქ რუსთავში. გამომდინარე იქიდან, რომ ვიზრდებოდი აქტიური სპორტსმენების ოჯახში, მალევე გამიტაცა კალათბურთმა, რომელიც საბოლოოდ ჩემი ცხოვრების განუყოფელ და ერთ-ერთ უმნიშვნელოვანეს ნაწილად ჩამოყალიბდა. საქართველოს ჭაბუკთა და ახალგაზრდულ ნაკრებებში თამაშის შემდეგ, 17 წლის ასაკში გადავბარგდი სლოვენიაში, სადაც გავატარე ჩემი კარიერის საუკეთესო წლები და რომელიც ჩემთვის და ჩემი ოჯახისთვის გახდა მეორე სამშობლო. ლუბლიანას “ოლიმპიაში” 7-წლიანი მოღვაწეობის შემდეგ, ჩემი სპორტული გზა გამიძღვა იტალიაში, რუსეთში, საბერძნეთში, ესპანეთსა და ხორვატიაში და საბოლოოდ დამაბრუნა სამშობლოში – საქართველოში – სადაც 2013 წელს დავასრულე კიდევაც აქტიური სპორტული კარიერა. ჩემი საკალათბურთო კარიერის ყველაზე საამაყო მიღწევა გახლდათ საქართველოს ეროვნული ნაკრების ღირსების დაცვა, რისი პატივიც 15 წლის განმავლობაში მეძლეოდა.